На 6 и 7 септември во хотел Бисер, Струга, се одржа Единаесеттата енергетска тркалезна маса за Југоисточна Европа. Домаќини на настанот беа Самостојниот синдикат на енергетика, рударство и индустрија (ССЕРИ) и Самостојниот синдикат на работниците од енергетика и стопанство на Македонија (ССЕСМ). Организатор на настанот беше Европската федерација на синдикатите за јавни услуги (ЕПСУ) во партнерство со и Фондацијата “Фридрих Еберт“. Со собирот претседаваше г-дин Јан Вилем Гудријан, Заменик-генералниот секретар на ЕПСУ, а учествуваа синдикатите од Југоисточна Европа од областа на енергетиката и тоа од: Босна и Херцеговина, Бугарија, Хрватска, Црна Гора, Романија, Србија и Словенија. На семинарот исто така зема учество Јозеф Крејбич, претставникот на ЕПСУ задолжен за регионот.
Целта на тркалезната маса беше дискусија за енергетската ситуација во Југоисточна Европа и позицијата на Македонија, известување за резултатите на работната група за колективното договарање, социјалните планови за акција во земјите од регионот, состојбата со европскиот социјален дијалог од областа на гасот и електричната енергија, како и имплементирање на Меморандумот на разбирање. Претставниците на синдикатите од регионот ги координираа ставовите и заедничките пораки кои сакаат да ги пренесат на 4-от социјален Форум закажан за 4 октомври, Молдавија, каде ќе присуствуваат државни делегации од сите земји во регионот. Понатаму, синдикалните претставници дискутираа за активностите на Постојаниот комитет на EPSU и улогата на јавните комунални услуги, како и за понатамошните заеднички активности.