Како што веќе најавивме, синдикатите од земјите-кандидати за влез во ЕУ (Србија, Македонија, Црна Гора, БиХ, Хрватска) и Словенија се договорија на формирање на Регионален синдикален Совет со цел поактивно вклучување во интегративните процеси на своите држави, под кооринативна поддршка на Регионалната канцеларија на Фондацијата Фридрих Еберт во Белград. Минатата недела (31 март, 1 април) во Љубљана, претставници од сите вклучени синдикати го официјализираа основањето на Регионалниот синдикален совет наречен „Солидарност“ кој ќе дејствува во насока на решавање на низата проблеми и размена на позитивните практики за нивно решавање со цел подобрување на работните, материјалните и социјалните услови на работниците чии интереси ги застапуваат синдикалните централи. Меѓу другото експертите кои ќе работат во овој Совет ќе вршат размена на информации и искуства во процесот на прилагодување на стандардите на ЕУ, афирмација и следење на конвенциите на МОТ, промовирање на синдикалната соработка на ниво на претпријатија и мултинационални компании, поттикнување и стимулација на интегративните процеси во синдикалното движење, афирмација на синдикалното дејствување помеѓу младите, афирмација на политиката на еднакви можности, едукација на синдикалните претставници, итн.