КОНФЕДЕРАЦИЈА НА СЛОБОДНИ
СИНДИКАТИ

СОЈУЗ НА СИНДИКАТИТЕ
НА МАКЕДОНИЈА

Со започнувањето на реформата во пензискиот систем  од 2000 до денес, се направија многу значајни промени во пензискиот систем во државата, почнувајќи од воведувањето на тростолбен пензиски систем, задолжителното социјално осигурување, па се до промените во условите за пензионирање.
Сојузот на синдикатите на Македонија уште од самиот почеток на реформата, а подоцна се приклучи и Конфедерацијата на слободни синдикати, бараше во државата да постојат повеќе услови за пензионирање во Законот за пензиско и инвалидско осигурување.
Во Република Македонија денес постои само еден услов за пензионирање  (возраст - 62ж. 64м. и минимум 15 год. работен стаж), кој не е доволен и не дава можност за избор при пензионирањето и по други услови, познати во скоро сите земји од Европската Унија.
Потребата од постоење на повеќе услови за пензионирање е неопходност во Република Македонија бидејќи постоењето само на еден услов, не може да ги апсорбира сите специфични отежнати  услови за работа во одделни дејности, неможноста да се работи поради здравствени проблеми и проблемите што ги создаде транзицијата  (стечајни работници, работници технолошки вишок, социјални случаи, кои неможат повторно да се вработат било поради годините на возраст или не се со квалификации што ги бара новото време на работење).
За таа цел, Сојузот на синдикатите на Македонија и Конфедерацијата на слободни синдикати, по барање на своето членство, до Владата на Република Македонија  ја поднесуваат следната:
ИНИЦИЈАТИВА
за воведување на повеќе услови за пензионирање во
Законот за пензиско и инвалидско осигурување
Во Република Македонија покрај постојниот услов за пензионирање, да се воведат и следните услови за пензионирање:

1. Старосна пензија - по работен стаж

35 години работен стаж - жена - без оглед на годините на возраст
40 години работен стаж - маж   - без оглед на годините на возраст

Овој услов да се применува најдоцна до 2015 година.

2. Старосна пензија - по возраст или работен стаж - по дејности

Работниците во државата се вработени во различни дејности и извршуваат работни задачи кои се различни по тежина и по услови каде тие се извршуваат. Затоа е потребно со закон да се предвидат едни услови за пензионирање на градежен работник, на текстилен работник, на рудар од оној работник на пример што е вработен во администрација. Доколку се утврдат различни услови на пензионирање тие ќе бидат со право на избор на работниците, а не задолжителни, од волјата на работникот ќе зависи под кои услови ќе сака да се пензионира.

3. Предвремена старосна пензија по возраст

Се предлага да се воведе право на работниците на предвремена старосна пензија која би се остварувала по условот возраст од 60 години, со минимум работен стаж од 15 години.
Корисници на предвремена старосна пензија  можат да бидат работници кои работат но, неможат да продолжат да работат од одредени причини (здравствени, работни, а неможат да се прогласат инвалиди, поради стечај или ликвидација) или  се невработени, а го исполнуваат условот - минимум 15 години работен стаж. Овој вид на пензија би се остварувала исклучиво по вoлја и барање на работникот.
Овој услов за пензионирање во скоро сите земји од Европската Унија е познат како општ услов за пензионирање и тој се остварува на 60 години возраст.

4. Неполна старосна пензија по возраст

-    да се овозможи на работниците сами да го платат придонесот за пензиско и инвалидско осигурување доколку го немаат исполнето условот минимум 15 години работен стаж,
-    правото на само уплатување на придонесот, да го имаат работници на кои им недостасуваат до 3 години работен стаж од минималните 15, а го исполнуваат условот возраст ( 62, односно 64 години).

ПРЕТСЕДАТЕЛ на КСС
Раско Мишкоски

ПРЕТСЕДАТЕЛ на ССМ
М-р. Живко Митревски

Скопје, февруари 2011 година